Mia artikolo ''Esperanto en interreto. Ĉu krizo?'' kaŭzis sufiĉe neatenditan de mi longan diskuton en tiu ĉi retejo kaj diversaj yahoo-grupoj. Homoj reagis tute diverse: iuj subtenis, iuj oponis. Rezulte de tiu diskuto aperis nova projekto por krei esperantlingvan manlibron pri interreto, kiu ĉefe devas helpi konatigi esperantistojn kun interreto kaj pli efike agadi internaciskale, uzante modernajn teknologiojn de la komunikado.

Ĵus lanĉita projekto jam havas kvar kunlaborantojn, inter kiuj estas, ekzemple, Yves Nevelsteen E@I-estrarano el Belgio.

Ni volas, ke tiu manlibro estu plena kaj efika kaj pro tio ajnaj konsiloj, komentoj aŭ kontribuoj estas tre bezonataj kaj bonvenaj. Ne ĝenu esprimi vian opinion pri la projekto.